Literatur idazlanak
DGA-1^
Pagoen orriak pagadiz pagadi
maiatz berriaren pozetan dantzari
berriro sortu den udaberri argiz
basoak bigunik dira mendiz mendi.
Kukua jo ta jo ari da kotoizko kantua
paisaiaren zazpi muino orbeltsutan (1)
bizitza hain maite dugunoi berriro
lurreko egunak maitatu eraziz.
Kristala, urrea, arrosa, zer esan
sentimen gozoa adierazteko?
Larreetan behorrek irrintzi dagite
odol berrituak beroz eraginda.
Jendeak ez daki zergatik barrea
samurrago zaion irteten hain erraz
maitagarriago gara gizartean
itxaropen-hitzak elkarri zuzenduz.
Alaiagoa da eguzkia bera (2)
harkaitzen biluzez mendiak barrena
majia ederrez liluragarrituz
aireko freskura, giro garbiz zehar.
Pentsamendu lorez jantzitako askoz
bete zait burua argituz bizitza
berpiztu ametsa, fedea piztu zait
bazko-igandeko goizean holatsu.
Sakratu-kutsua nabari dut erruz
Jainkoak aurretiz oparo demaigun
betiko bizitza honen garantia
emango baligu udaberri oro.
Irudimenean Bazkoa-zuzia
maitasun guztiaz agurtu dut hemen
inguru guztiko paisaia ederra
honen errainuei apalki eskainiz.
Bizitzari beti bizi den indarra
esan diot pozak alde ez dagion
ta kantura deitu dut bizitzazko garra
beti bizi duen Izaki gurena gurtzera.
Ernamuin ireki berrien, sortu diren loreen
berritan da dena, maitakor ta gozo
bihurtuz bazterrak, kukuaren kantu
lasaigarria dut otoitzean lagun.
