Bitoriano Gandiaga

Literatur idazlanak

L3G^

Andra Marixa Martiko,
artian udia tatiko,
handik aurrera betiko. [I]

Mendi eta zuhaizti
oraindik marroizka,
Gabonetik apenas
den ezer berrizta;
zelaietan ostera
badager aldizka
narziso ta besteren
goraintzi alaizka.
Zuzpertu zait bihotza,
alegratu bista.

Gehienbat kolorea
neguarena da,
noiznahi txingorra eta
elur-zaparrada;
ordea aterri ta
eguzkirik bada,
ari da Martxoaren
pozezko bultzada,
ederra da pinporten,
kimen abiada.

Bizitzaren zirrara
izakiz izaki,
hiltzen ez den zerbaitek
hortxe daramaki,
pizten du landare ta
abere, gizaki
biziguraren gili*
brintza eramaki;
sentikor den bizidun
edozeinek daki.

Urtero gara bizitz-
oldarren testigu,
ezuste genituen
zartak datorzkigu [sic];
Udaberri-sentiak
tenkor daragigu
zein-eta bizipoza
nahasiko baligu,
halako eraginak
jabetzen zaizkigu!

Gozoa da garai hau
bizi garenontzat
zauskada bizkor batek
baitaragigu zart;
dena doa irekiz
handiro ta ausart,
dena da mugimendu,
dena da zalapart,
dena du asaldatu
bizipozak bapat.

Bizitzaren deiari
esker onez agur
besarkatuz bizitza,
zeru, aire ta lur.
Pozik nago bizitza
nabarituz hain hur,
zainen barruz ari zait
zorionaren urv
odola ferekatuz
gozotsu ta samur.

San Jose jaia dugu
jada begi bistan,
Sanjoseloreen drizak*
zer poza damostan,
San Jose hain zait neri
txikitatik laztan,
non Jose Orbelaungo [II]
gogoratzen deustan;
gaxoak biziz pozten
irakatsi eustan.

Egutegiz egunak
dira hegaz ari,
binbitartean hortxe
uda, tatilari*;
hogeitabostgarrenez
Andredena Mari,
Andre Mari Martiko
udaren atari,
begira gaitezkeo
jada jar udari.

Argia ta epela,
bizitza ari da,
geroz ederrago da
agertzen mugida,
badugu bizitza nork
han hemen gaztiga,
txoriak ere mila
kantuz ari dira,
pozaren nahitaezko
aldarri balira.

Mendietan elurra,
lorak ibarretan,
Martxoaren martxa da
gure lur honetan.
Bizipozaren poza
bizi da loreetan,
denok goaz gaztetuz
amets berrietan
amairik ez daukaten
bizi-gogoetan.

Biba bizitza eta
biba udaberri,
kristinau geranontzat
Pazkoa da gerri;
oraindikan bizitza
hain dugu hasberri,
bizitza bera ezin
geneza igerri.
Kristo piztuan uste
dugu eguberri.

Gure bizitza nahiak
asea du gogo,
ez baitugu inolaz
izan meteoro
bizi eta bizi nahi
dugu osotoro
gu sortu gintuena
ez daiteke zoro:
bizitza biziz gaiten
egin gaitu oro.

1985 - martxoa

Gaia 1: Urtaroa
Gaia 2: Lagunak
Azpi-gaia: Urtaroa: Udaberria
Edizio kritikoa: Paulo Agirrebaltzategi
Gipuzkoa.net-aren logoa